حیدر بابا

قسمت اول

حیدر بابا ایلدیریملار شاخاندا

سئللر ,سولار ,شاقیلدییوب ,آخاندا

قیزلار اونا صف باغلییوب باخاندا

سلام اولسون شوکتوزه ,ائلوزه!

منیم ده بیر آدیم گلسین دیلوزه!


قسمت دوم
حیدر بابا ,کهلیک لرون اوچاندا

کول دیبیننن دوشان قالخیب ,قاچاندا

باغچالارون چیچکله نیپ ,آچاندا

آچیلمیان اورکلری شاد ائله!


قسمت سوم
بایرام یئلی چارداقلاری ییخاندا

نوروز گولی, قارچیچه گی چیخاندا

آغ بولوتلار کوینکلرنین سیخاندا

بیزدن ده بیر آد ائله ین ساغ اولسون

درد لر یمیز قوی دیکلسین, داغ اولسون



قسمت چهارم
حیدر بابا گون دالیوی داغلاسین !

اوزون گولسون بولاقلارین آغلاسین !

اوشاقلارین بیر دسته گول باغلاسین!

یئل گلنده , وئر گتیر سین بو یانا

بلکه منیم یاتمیش بختیم اویانا



قسمت پنجم
حیدر بابا ,سنین اوزون آغ اولسون

دورت بیر یانین بولاق اولسون باغ اولسون

بیزدن سورا سنین باشین ساغ اولسون

دونیا قضو - قدر اولوم ایتیمدی

دونیا بویی اوغولسوز دی , یئتیمدی



قسمت ششم
حیدر بابا یولوم سنن کج اولدی

عومریم گئچدی ,گلنمه دیم گئج اولدی

هیچ بیلمه دیم گوزللرون نئج اولدی

بیلمزیدیم دونگله وار , دونوم وار

ایتگین لیک وار ,ایریلیق وار , اولوم وار


قسمت هفتم
حیدر بابا ایگیت امک ایتیر مز

عومور گئچر ,افسوس بره بیتیرمز

نامرد اولان عومری باش ا یئتیرمز

بیزده ,والله اونوتماریق سیزلری

گورنمه سک حلال ائدون بیزلر


قسمت هشتم

حیدر بابا " میر اژدر " سسله ننده

کنه ایچینه سسدن , گویدن دوشنده

"عاشیق رستم" سازین ,دیللندیرنده

یادوندادی نه هووله سک قاچاردیم ؟

قوشلار تکین قاناد چالیپ اوچاردیم؟



قسمت نهم
"شنگیل آوا " یوردی "عاشیق آلماسی "

گاهدان گئدیب , اوردا قوناق قالماسی

داش اتماسی ,آلما هئیوا سالماسی

قالیب شیرین یوخی کیمی یادیمدا

اثر قویوب رو حوم دا , هر زاد


قسمت دهم
حیدر بابا " قوری گولون" قازلاری

گدیک لرین سازاق چا لان سازلاری

کت کوشنین پاییز لاری , یازلاری

بیر سینما پرده سی دور گوزومده

تک اوتوروب سئیر ائده رم اوزومده